Walang conflict sa pagsali ni De Lima sa House prosecution panel - solon
MANILA, Philippines — Walang nakikitang anumang ‘conflict of interest’ si House Assistant Majority Leader at Lanao del Sur Rep. Zia Alonto Adiong sa planong pagsama ni Mamamayang Liberal (ML) Partylist Rep. elect Leila de Lima sa House prosecution panel na siyang lilitis kay Vice President Sara Duterte sa nalalapit na Senate impeachment trial.
Sinabi ni Adiong na sa katunayan ay isang asset si De Lima sa prosecution team lalo na aniya at marami itong alam sa mga isyu ng ExtraJudicial Killings (EJK).
Inilarawan ni Adiong ang pagsama kay De Lima bilang isang lehitimo, istratehiko, at sumunod sa mga patakaran ng Kamara, bilang tugon sa mga batikos ng ilan kaugnay ng pagiging kritiko nito ni dating pangulong Rodrigo Roa Duterte.
“Wala naman siyang conflict dahil ang sinasabi naman sa rules, sa aming rules, ay kailangan miyembro ng House of Representatives. Si Congresswoman Leila de Lima naman ay magiging member ng House of Representatives sa 20th Congress,” paliwanag ni Adiong.
Itinuro rin ni Adiong na pinapayagan ng House ang pagkuha ng external legal experts upang makatulong sa pagbubuo ng matibay na kaso, na may precedent noong 2012 impeachment trial ng yumaong si dating Chief Justice Renato Corona.
Aniya, ang track record at legal experience ni De Lima ang dahilan kung bakit siya ay kuwalipikado upang tumulong sa pag-uusig kay Duterte.
Inaasahan namang pinal na babalangkasin ng Kamara ang 11-member prosecution team bago magbukas ang 20th Congress sa Hulyo, kung kailan magsisilbing impeachment court ang Senado.
- Latest
