P23 milyong droga sa food delivery boxes samsam
Repacking hub sa Davao ni-raid ng NBI
MANILA, Philippines — Tinatayang P23-milyong halaga ng shabu at imported marijuana o kush ang nasabat ng mga ahente ng National Bureau of Investigation-Southeastern Mindanao Regional Office (NBI-SEMRO) sa isang ni-raid na repacking at distribution hub, sa Davao City, madaling araw nitong Linggo.
Sa ulat kay NBI Director Judge Jaime Santiago, nagsagawa ng anti-drug operation ang NBI-SEMRO XI, sa pamumuno ni Regional Director Atty. Arcelito Albao, alas-5:00 ng madaling araw nitong Hunyo 8, 2025, sa isang residential unit sa Emily Homes, Cabantian, Davao City kung saan inire-repack ang mga iligal na droga matapos matanggap ang impormasyon.
Nasamsam ang 4.885 kilo ng kush na may street value na P5.86 milyon; 1.575 kilo ng shabu na katumbas ng P17.325 milyon; food delivery boxes ng Foodpanda at Maxim, heat sealer at gamit sa repacking; imported cannabis-based products na kinabibilangan ng mga Boutiq Switch V3 HCT concentrates, Kaws Exotic and Cereal Edition packages, mga Packwoods X Runtz vape pens, Bored Hash Headibles, Big Chief Guava live resin at Sluggers Hit Disposables.
Ang iligal na operasyon umano ay isinasagawa sa pamamagitan ng food delivery upang ikubli ang mga iligal na droga.
Ayon sa mga residente ng Emily Homes, ang nakatira sa naturang bahay na pansamantalang hindi muna kinilala, ay nagpanggap na isang negosyanteng may lehitimong food supply at delivery business.
Wala ang mga gumagamit ng bahay na nagsisilbing imbakan ng shabu at marijuana nang salakayin ito ng mga NBI agents, ayon sa mga kinauukulan.
Nakipag-ugnayan ang NBI sa Philippine drug Enforcement Agency (PDEA) Region XI at may presensya ng barangay officials sa lugar nang isinagawa ang operasyon.
- Latest
