Mao diay
Mao diay. Nga hilom si outgoing Governor Gwen Garcia dihang nipasaka og election protest atubangan sa Commission on Elections (Comelec) niadtong Mayo 23. Wala siyay gipahibawo nga bisan usa ka sakop sa media. Bisan ang iyang TikTok department sa Kapitolyo walay notisya nga pormal na niyang gikuwestiyon ang resulta 11 ka adlaw human sa eleksiyon.
Kay wala pa diay makumbinser sa pasangil sa tikas. Sa labing unang pagpakita sa publiko human sa eleksiyon, niangkon si Garcia sa iyang diskurso sa Robinsons Galleria niadtong Mayo 16 nga mora siya og napilde.
-o0o-
Mao diay. Nga sa labing unang pahibawo sa pagpasaka sa election protest, atol sa diskurso atubangan sa mga mayor nga iyang gitapok sa Kapitolyo niadtong Hunyo 3, kapin na sa tulo ka semana human sa eleksiyon, wala siya mopakita og bisan unsang ebidensiya.
Kay wala pa gyod diay siyay ebidensiya. Maong igo lang nitug-an, sa walay paghatag og detalye, nga dunay technical ug software-proven evidence pagmaniobra sa automated counting machines (ACMs) nga gipakatap sa Probinsiya sa Sugbo. Mao nga ang iyang mga boto giihap pabor ni Governor-elect Pam Baricuatro.
-o0o-
Mao diay. Nga si Garcia nga gikaintapan sa walay pupanagana nga pagwara-wara sa mga dokumento nga nipakauwaw sa iyang mga kaatbang, o ni bisan kinsang nangahas sa pagsukwahi niya, tak-om sa mga sukaranan sa iyang pasangil sa pagpanikas. Walay gipakitang kopya sa iyang election protest.
Maong nagpabiling misteryo sa mga Sugboanon unsay iyang mga ebidensiya. Hangtod niadtong Martes. Kanus-a gibisto sa mga abogado ni Baricuatro ang gidudahan sa kadaghanan: Nga walay ebidensiya si Garcia.
-o0o-
Mao diay. Nga kapin na sa buwan human napasaka ang election protest, walay abogado ni abogada ni Garcia (nga gitambagan na sa Ombudsman sa dili pagyango sa bisan unsay isugo sa ilang kliyente) nga nipasabot sa kalig-on sa ilang kaso.
Kay ang protesta igo lang nisaysay sa pagduda sa tikas, walay bisan unsang detalye sa maniobra sa bisan asang presinto. Ug igo lang nangopya sa affidavits nga gigamit ni kanhi Mandaue City Mayor Jonas Cortes sa iyang kaugalingong protesta batok ni Mayor-elect Jonkie Ouano. Mao diay. Nga walay mayor, kongresista ug kapitan, nga nitingog pag-suporta sa protesta ni Garcia.
- Latest
