Philhealth nakabayad na og P592 milyones ngadto sa NKTI
CEBU, Philippines — Ang Philippine Health Insurance Corporation (PhilHealth) naka-disburse na og kapin sa P592 milyones nga kantidad sa mga claims nga gibayad ngadto sa National Kidney and Transplant Institute (NKTI) gikan Enero 1 hangtud Mayo 21 ning tuiga.
Kini ang gibutyag ni Acting PhilHealth President and CEO Dr. Edwin M. Mercado atol sa iyang pagbisita sa NKTI.
Tumong sa iyang personal nga pagbisita mao ang pagsiguro nga ang mga pasyente nga gipaubos og hemodialysis ug uban pang renal replacement therapies makadawat sa ilang mga benepisyo gikan sa state health insurer.
“Alinsunod sa prayoridad ng ating Pangulong Bongbong Marcos, Jr., ako ay bumibisita at nakikipagpulong sa mga partner health care facilities para malaman at personal kong makita kung paano natutugunan ang pangangailangan ng ating mga kababayang may sakit, at siguruhing mabilis tayong nakapagbabayad ng mga benefit claims,” matud ni Dr. Mercado.
Niadtong 2023, ang PhilHealth nagsugod sa pagpalambo sa mga benepisyo niini alang sa mga miyembro nga adunay chronic kidney disease (CKD) stage 5.
Ang mga kalamboan naglakip sa pagpalapad sa mga hemodialysis sessions gikan sa 90 ngadto sa 156 kada tuig, ang pagtaas sa Z Benefit Package alang sa peritoneal dialysis ngadto sa P1.2 milyones, ug ang pag-usbaw sa Z Benefit coverage alang sa kidney transplantation gikan sa P600,000 ngadto sa P2 milyones.
Samtang, niingon usab si Mercado nga wala pay lima ka buwan karong tuiga, ang PhilHealth nakabayad na og P161 milyones alang sa hemodialysis procedures sa NKTI.
Siya midugang nga kini nagpakita sa pagtaas sa paggamit sa hemodialysis benefit package, nga naghimo sa hemodialysis nga top paid medical procedure sa tibuok nasud sa tuig 2024. (BANAT NEWS)
- Latest
