Buta milugos sa laing buta

CEBU, Philippines — Nabalhog sa prisohan ang usa ka buta nga masahasita human gipasanginlan nga miamung-among matod pa sa ka board mate niini nga partially blind usab diha sa Barangay Apas, Siyudad sa Sugbo niadtong Biyernes sa hapon, Mayo 23, 2024.

Ang biktima mao si alyas Marie, 22 anyos, usa ka person with disability ug taga Barangay Apas, Cebu City.  Samtang ang gipasanginlan mao si alyas Onyok.

Base sa imbestigasyon sa Mabolo Police Station 4 Cebu City Police Office ang suspetsado giadto sa kapulisan sa gitrabahoan niini sa usa ka mall kay gireklamo sa biktima.

Nidangop ang biktima sa Mabolo Police Station 4 ug misumbong nga siya matud pa giamung-amungan sa suspek.

Base sa gibutyag sa biktima ngadto sa kapulisan, kini mialegar nga pugsanon siyang gihilabtan sa suspek ug giingong gihulga nga patyon kun mosyagit ug mosumbong.

Ang suspek sa iyang bahin miangkon nga dunay nahitabo sa ilaha sa biktima katulo ka higayon na ug kini miklaro nga wala niya pugsa ang biktima.

Giandam na sa kapulisan ang kasong ipasaka batok sa suspetsado. (BANAT NEWS)