Pag-inutil ni Pam Baricuatro
Sa akong pagsuwat niini, nagpadayon pang special session sa Cebu Provincial Board nga gipatawag ni outgoing Cebu Governor Gwen Garcia aron, segun pang outgoing Vice Governor Junjun Davide, pag-aprobar sa supplemental budget nga wala niya isulti kon pila. May sukaranan ang mga kahibulong nganong mogahin silang Garcia ug iyang mga alyado og dugang kuwarta patong sa P25 bilyones nga budget sa probinsiya karong tuiga. Nga nakapatumaw sa sunod nga lima ka pangutana:
1. Unsa man ang dinaliang gastohan nga wala mahunahunai nilang Garcia ug kaubanan sa wala pay eleksiyon, nga karon na lang nila mabantayi nga labihan diay kadinalian busa kinahanglan gyong maaprobahan bisan kapin sa buwan na lang ang nahibilin sa ilang termino?
* * *
1. Duna bay importante ug dinaliang proyekto ang Kapitolyo nga wala nila malihok kay natingob ang atensiyon sa niaging kampanya sa eleksiyon nga wala silay klarong mga kontra, pipila nila wala gani kaatbang, maong maglisod pa si Garcia sa pagdawat hangtod karon nga napilde siya og karibal nga ang apelyido dili Durano, Magpale o Martinez?
2. Duna bay dagkong utang nga wala atimana sa pagbayad sa wala pay eleksiyon (hinaot dili sama ka-karaan sa utang ni Garcia sa Hong Kong and Shanghai Banking Corporation sa 1996 nga iyang gilangay-langay pag-ayo nga kinahanglang ang Korte Suprema nay maningil) tungod sa nasobrahang pagsalig nga ang Garcia country ang Sugbo ug kontrolado ni Garcia ang 3.4 milyones ka rehistradong mga botante sa Sugbo?
* * *
1. Duna bay bag-ong mga utang nga nakontrata tungod sa wala paabota nga mas dakong gasto sa eleksiyon kay uwahi nang nabantayan nga ang kaatbang ni Garcia dili diay sama ka-inutil, nga si Garcia wala na diay kahadloki sa mga botante, nga ang mga Sugbuanon giluod na diay niya ug nga dili na sila mailad sa P20 nga kilo sa bugas humay?
2. Ganahan ba lang si Garcia nga ma-inutil ang administrasyon ni Governor-elect Pam Baricuatro maong tilukon ang tanang kuwarta, binlan na lang og pundo para sa suweldo sa mga trabahante, krudo ug gasolina sa mga sakyanan ug tubig ug kuryente sa Kapitolyo, sa ingon wala nay bisan usa ka dako nga magamit sa pagpalambo sa provincial hospitals ug paglusad og mobile clinics ug mobile kitchens?
* * *
- Latest
