Mas dako, mas bongga nga COI Run selyado na sa Hunyo 15

CEBU, Philippines — Ang Cebu Orthopaedic Institute moselebrar sa ika-26 nilang anibersaryo uban ang mas dako ug mas bongga nga COI Run nga gikatakda karong Hunyo 15 diha sa Pescadores Road sa Cebu Business Park.

Gawas sa 3K, 6K, ug 12K, giapil sa COI ang 21K category ning higayon aron mamahimong mas kulbahinam ang ikaduhang edisyon sa tinuig nilang kalihukan.

“We recognize that physical fitness can be achieved in several ways. Running is not only accessible to all individuals of various ages and backgrounds, but it is also a cost-efficient and environmentally-friendly method to improve your overall health and well-being,” matud pa ni Dr. Hester Renel Lim Palma sa COI.

“Given the success of last year's event and an increase in the demand for another fun run, we are expecting close to 2000 participants this year,” dugang pa ni Palma.

Ang Top 3 finishers sa tanang distansiya parehong makadawat og ganting salapi ng P3,000, P2,000 ug P1,000. Pasidunggan sab ang mga top performers sa 21K sa tanang age groups gikan sa 20-24 ngadto sa 70-above.

Ang kita sa mahinungdanong aktibidad idonar sa Missionaries of the Poor ug sa nagkadaiyang medikal nga mga organisayon nga nagsuporta sa misyon sa COI nga mao pagsabwag og maayong panglawas sa komunidad.

Ang rehistrasyon nagkantidad og P800 sa 3K, P900 sa 6K, P1,000 sa 12K, ug P1,400 sa 21K apil na niini ang race shirt, bib, timing chip, drawstring bag, post-race meal ug raffle stub alang sa tsansa nga makadaog og Honda Wave nga motorsiklo, duha ka window-type air conditioning units, usa ka water dispenser ug daghan pang maanindot nga mga premyo nga i-raffle human sa lumba.

Kadtong interesado moapil mahimong magpareghistro sa RUNNR sa Ayala Center Cebu matag Biyernes, Sabado ug Dominggo o sa online pinaagi sa https://cocorunning.myruntime.com/register/cebu-orthopaedic-institute-run-2025.