Duterte wala makabotar

CEBU, Philippines — Kanhi presidente ug Davao City mayoralty candidate Rodrigo Duterte wala makabotar gikan sa detention cell niini sa International Criminal Court sa The Hague sa Netherlands kagahapon.

Kini human nga dili siya rehistradong overseas voter sumala pa sa Commission on Elections.

Giklaro sa Comelec nga nituman sila sa Republic Act 10590 (amended Overseas Voting Act of 2013) nga diin gitugotan ang mga Pilipinong toa sa abroad apan kinahanglang rehistrado silang overseas voters.

"A registered voter must manifest his intention to move to overseas voting during the period for registration," matud pa sa tigpamaba sa Comelec nga si John Rex Laudiangco pinaagi sa text diha sa Philstar.com kagahapon, Mayo 12,2025.

Giklaro kini Laudiangco human nga si Bise Presidente Sara Duterte miingon nga ang kanhi pangulo wala makabotar nga unta iyaha man kining katungod samtang toa siya sa prisohan sa ICC.

Si VP Duterte namahayag ani human siya nakabotar didto sa Davao City. Matud pa niya, ang iyang abogado nangayo og permiso sa Comelec kun makabotar kini gawas sa absentee voting law, apan dili siya rehistrado.

Apan si Comelec Chairperson George Garcia miklaro nga wala silay nadawat nga request gikan sa kampo ni Duterte aron mahatagan kini og exemption aron makabotar.

"Wala po kami natatanggap na request (We have not received any request)," matud pa sa iyang text message sa mga tigbalita.