Audit sa Kapitolyo

Angayng ipasabot ni outgoing Cebu Gov. Gwen Garcia nganong taas kaayong presyo sa bas ug graba sa Sugbo ubos sa iyang administrasyon. Tinuod ba nga ang presyo sa bas ug graba sa Sugbo mas taas kay sa ubang mga probinsiya apil na sa Metro Manila?

Angay sang imbestigahon ni Governor-elect Pam Baricuatro ang gihulagway nga artipisyal nga kataas sa presyo sa bas ug graba sa Sugbo. Hinaot nga ang iyang gisaad nga audit sa mga transaksiyon sa Kapitolyo dili pagpanggukod batok ni Garcia kon dili aron pagpanalipod sa mga Sugbuanon.

***

Angayng tubagon ni Garcia ang pasangil nga dunay grupong nagkontrolar sa negosyo sa bas ug graba sa Sugbo. Ang grupo sa mga negosyante gipasanginlan nga nimaniobra sa suplay ug presyo pagpaburot sa ilang ginansiya.

Angay sang imbestigahon ni Baricuatro ang pasangil nga dunay koneksiyon sa Kapitolyo ang cartel sa bas ug graba. Duna gani pangangkon nga paryente ni Garcia ang usa sa mga haligi sa cartel. Angay sang utingkayon ni Baricuatro ang pasangil nga ang cartel gipaboran sa mga lagda nga giluwatan sa administrasyon ni Garcia para sa industriya.

***

Angayng tubagon ni Garcia, ug susihon ni Baricuatro unsa katinuod, ang pasangil sa pipila ka mga negosyante nga gihasi sila sa nagpailang mga sinaligan sa gobernadora:

•             Kay gipasanginlan nga nisuporta sa mga kaatbang ni Garcia sa politika sa nangaging mga eleksiyon;

•             Kay wala mohatag sa gipangayo nga dagkong kantidad bugti sa pag-aprobar sa ilang gi-aplayan nga mga permiso; ug

•             Kay ang ilang mga negosyo nakaribal sa giingong paborito nga suppliers sa Kapitolyo.

***

Angay sang ipasabot ni Garcia, ug imbestigahon ni Baricuatro uban sa tabang nilang Cebu City Mayor-elect Nestor Archival ug Vice Mayor-elect Tommy Osmeña, ang pasangil sa mga konsumidor sa Metro Cebu Water District (MCWD) nga:

•             Giapiki sa mga opisyal sa Kapitolyo ang dakong kompaniya nga usa sa labing unang gikontrata sa pag-suplay og tubig sa MCWD; maong

•             Napugos ang kompaniya sa pag-surender sa ilang kontrata kay dili ganahan og gubot ang mga tagdumala; ug

•             Gipulihan dayon og laing kompaniya, nga gikatahong naglakip na sa pipila ka politiko, nga padayong nag-suplay og tubig sa MCWD pero gidoble na ang presyo.