Pacers 2-0 ang tirada, Thunder buot makatabla
CEBU, Philippines — Managlahi ang naa sa huna-huna sa Indiana Pacers ug Oklahoma City Thunder sa dihang magbangga na sab sila alang sa Game 2 sa best-of-seven NBA Finals karong adlawa (Lunes, Hunyo 9) didto sa Paycom Center sa OKC.
Ang Pacers naglaraw nga inaton ang ilang bentaha ngadto sa 2-0 samtang ang Thunder buot nga makatabla sa ikaduha nilang panag-abot nga gikatakda sa alas-8 sa buntag.
Ang Pacers maoy nakauna sa serye human gipakuratan ang inilog nga Thunder, 110-109, sa Game 1 niadtong Biyernes, Hunyo 6.
Salamat sa pagkamabayanihon ni Tyrese Haliburton, nga mipasud sa krusyal niyang itsa sa nahibilin nga 0.3 segundo aron silyohan ang makapaisa'g buhok nga kadaogan sa Pacers.
Usa ka dakong surprisa ang nakab-ot sa Pacers nga nalubong og 15 puntos sa sayong bahin sa katapusang kuwarter sa wala pa milusad og impresibong pagbalitok.
Plano sa Pacers nga usban ang Thunder apan angayan silang mangandam sa usa ka dakong gubat gumikan kay ang OKC nagpangagot nga makabawos human mauwawan atubangan sa bagang panon sa ilang fans.
Gawas ni Haliburton, ang Pacers magsandig sab nilang Pascal Siakam, Andrew Nembhard, Myles Turner, Obi Toppin ug Bennedict Mathurin.
Samtang ang Thunder maglaum nilang season MVP Shai Gilgeous-Alexander, Jalen Williams ug Chet Holmgren sa ilang tinguha nga moresbak sa Pacers.
- Latest
