P20 nga bugas gilinyahan sa mga tawo

CEBU, Philippines — Panaad kanhi ni President Ferdinand "Bongbong" Marcos Jr. nga tag 20 pesos matag kilo nga bugas opisyal nang gilusad ang pagbaligya niini sa Sugbo sugod kagahapon adlaw nga  Huwebes dungan sa pagtimaan sa Labor Day, Mayo 1.

Si Agriculture Secretary Francisco Tiu Laurel maoy nangulo sa opisyal nga deklarasyon sa pagbukas sa pagbaligya sa tag 20 pesos matag kilo nga bugas sa Probinsya sa Sugbo.

Ang mga tawo mahimong makapalit hangtud napulo ka kilong bugas matag semana ilabi na kadtong mga tawo nga naa sa vulnerable sector sa community.

Uban ni preventively suspended Cebu Governor Gwendolyn Garcia, mga opisyal sa probinsya, mga mayores ug ni Secretary Christina Garcia-Frasco, nilibot sila uban ni Laurel sa mga baligyang produkto gikan sa mga nagkadaiyang kalungsuran sa probinsya ug human niini ang pagpinirmahay na sa dokumento alang sa hingpit nga pagpamaligya sa bugas.

Gisunod dayon ang opisyal nga deklarasyon sa pag-abli na sa pagbaligya sa bugas ni Laurel pinaagi sa seremonya nga diin giuna ang mga senior citizens, PWDs, solo parents ug mga sakop sa 4Ps.

Gipangulohan usab ni Laurel ang ceremonial nga pagpangandam ug pagluto sa tag 20 pesos kilo nga bugas.

Gitilawan sa mga opisyal sa kagamhanan ang bugas gikan sa NFA aron sa pagseguro sa kalidad sa bugas nga ilang gibaligya.

Daghang nalipay sa kalidad sa bugas bisan sa kaubos sa presyo niini kay makapalit na sila og daghan kay para kanila lisod ang pagpalit og mahalong bugas.

Si acting Regional Manager sa NFA Ovelito Baritua, kapin sa onse mil ka sakong bugas ang ilang gigahin sa programa.

Apan 500 lang ka sako ang ilang gi-release kagahapong adlawa sa paglusad sa P20 Benteng Bigas Meron na Kami.

Apan daghan sa mga tawo ang wala mahimoot ug mihulagway nga kuwang ra kaayo kini tungod  pinili lang ang makapalit unya gi-subsidiya pa gyud sa gobiyerno mao nga kwarta gihapon sa katawhan ang gigamit.

 “P20 bigas ay di sapat, P200 umento din dapat!” Mao kini ang singgit sa mga militanteng grupo nga nagprotesta kagahapon dungan sa pagsaulog sa Labor Day.

Si Dennis Derige, Cebu coordinator sa Partido Manggagawa miingon nga dili paigo ang baratong bugas aron makatabang sa kalisod karon sa katawhan ilabi na sa mga mamumuo nga maoy tan-aw sa Malacañang.

Giawhag ni Derige ang pangulo nga ipatuman ang P200 nga umento sa inadlaw nga suholan sa mga mamumuo ug P20 nga subsidiya sa bugas, mao lang kini ang pasiunang alibyo aron tinud-anay nga matabangan ang mga kabus nga Filipinos.

“We ask President Bong Bong Marcos to certify as urgent the pending P200 salary increase bill in Congress,” matud pa sa pamahayag ni Derige.

Kagahapong adlawa, ang mga labor union ug mga militanteng pundok nanawagan sa pangulo nga i-certify ang P200 nga usbaw sa suholan. (BANAT NEWS)