Bukbokon ang sistema

Giangkon na ni Presidente Bongbong Marcos nga mga opisyales ra usab sa kagamhanan ang nagpaluyo sa pagpayuhot (smuggling) sa bugas busa nakapangutana siya kon ‘kinsa sila ug kon ngano nga wala pa sila ma-priso’.  Kini’ng pag-angkon sa presidente, mihatag og gibug-aton sa mga taho nga ang dagkong opisyal sa Customs ug sa Department of Agriculture maoy nagpaluyo sa rice smuggling.  Dili na mabangbang ang ka-walay puangod ug ka-walay konsensya sa mga opisyales sa Customs ug sa DA.  Mao kana’y giingon nga, “Bukbokon na gyud ang sistema sa Customs ug DA, sama ka bukbokon sa baligyang bugas sa NFA.”  Fezteleern!

Migraduwar apan illiterate?

Segun sa datos sa Philippine Statistics Authority (PSA), adunay 5.58 ka mga Filipino high school graduates nga maingon nato nga “functionally illiterate.”  Sila kadtong migraduwar sa high school nga maantigo kunohay mobasa, mosulat ingon man mo-compute apang kulang sa comprehension skills.  Nasayran ang pagka-functionally illiterate” sa atong mga graduae, luyo sa kamatuoran nga nabuang usab ang atong mga kabataan sa celfon ug uban’g electronic gadgets. Haum ang sugyot sa akong amigo nga, “Aron motaas ang antas sa pagpanabot sa atong kabataan, maayo tingale nga ato silang sultihan nga ilang utok usa usab ka “app” arong ila na kini’ng gamiton.”  Madahaan!

Sira-sira inay sari-sari store

Sumala sa pagtoon nga gihimo sa Packworks, usa ka local tech startup, nasayran nga padayon ang pagkunhod sa average nga kantidad nga gastohon sa mga konsumidor sa pagpalit sa mga “sari-sari” stores.  Kining maong trend nagpasabot lang nga limitado na ang disposable income sa katawhan.  Maoy hinungdan nga nauso na usab ang pagpalit sa mga “tingi” o repack nga mga produkto kay affordable lang ang presyo niini.  Matud pa sa akong amigo, “Tungod sa kanihit sa kwarta, kon wala pa’y mga “tingi” o repack, daghan “sari-sari” store nga ma-bankcrupt ug mamahimo na lang nga “sira-sira” store.”  Muleeng!

Timbangan ang mahibilin

Gihimug-atan ni Speaker Ferdinand Martin Romualdez ang giingon niya nga katumanan sa saad ni Presidente Marcos nga himoong affordable ang bugas sa katawhan pinaagi sa gilusad nga programa nga P20 matag kilo nga bugas.  Bisan sa pasalig ni Romualdez nga dili kini usa ka one-time roll out nga programa, daghan gihapon ang mga skeptics sa kamalahutayon niini tungod sa kadako sa budget nga kinahanglan igahin ingon man ang epekto niini sa uban’g mga lokal nga rice retailers.  Matud pa sa akong amigo, “Sa kakomplikado sa maong programa, basin ang kilohan o timbangan na lang magpabilin ug wala na’y bugas.”  Pagkatoytoy!

Amendahan ang party-list law

Buot ni Comelec Chairperson George Garcia nga amendahon na ang balaod kabahin sa party-list aron mahatagan og kahigayonan ang mga lehitimo nga pundok nga nagrepresentar sa mga marginalized sector nga makasalmot.  Dugay nga gitinguha sa kadaghanan ang pag-amendar sa party-list law tungod kay nasinati nga giabusahan kini sa mga adunahan’g politiko ug nahimo na hinoon nga himan alang sa pagpalambo sa ilang political dynasty.  Mao kana’y giingon nga “Inay morepresentar ang party-list sa mga anaa sa laylayan ug sa mga nahikawan, gidumala na man hinoon kini sa mga hawod ug adunahan.”  Atala lagee!