Trabahante gipadakop sa amo kay halin gipusta sa scatter

CEBU, Philippines — Gidakop ang usa ka trabahante og vape shop human gikatahong ang halin sa tindahan gigamit pagduwa og scatter nga usa ka online gambling diha sa Englis V. Rama, Barangay Guadalupe, Siyudad sa Sugbo niadtong Martes sa hapon.  Ang gidakop mao si alyas “Mark”, 28, adunay kaipon, residente sa nahisgutang lugar.

Samtang ang nagpadakop sa suspetsado mao ang tag-iya sa vape shop nga si alyas “Wilbert”, 35, molupyo sa Panganiban, Dakbayan sa Sugbo.

Gikataho nga naaktohan ni Wilbert ang suspetsado nga nikawat ang P24,000 nga halin ingon man ang mga disposable vape nga nagkantidad tanan P40,000 ug gisulod niini sa grocery bag.

Atol sa pagdakop sa suspetsado P7,500 nalang ang na-recover sa kapolisan nga kwarta tungod kay gikatahong nahurot na kini og pusta sa scatter.

Na-recover usab ang walay sulod nga mga disposable vape.

Dihang nahinabi sa DYSS Super Radyo Cebu ang suspetsado niangkon kini sa krimen nga nahimo gumikan ka na-adik siya sa sugal nga scatter maong naka-dispalko kini sa halin sa vape shop.

Gikataho nga dili kini ang unang higayon nga nasakpan ang suspetsado sa iyahang amo gumikan kay kaniadto nakadispalko na usab kini og P300,000 nga halin gihapon sa vape diin gipusta usab sa scatter apan gipasaylo kini sa iyahang amo.

Ang maong kantidadad gibayran sa suspetsado pinaagi sa salary deduction.

Ang suspetsado nanghinaot nga mapasaylo sa iyahang amo ug nisaad kini nga dili na niya kini usbon.

Nunot sa maong hitabo, giawhag ni Police Lieutenant Colonel Maria Theresa Macatangay, deputy city director for operation ug tigpamaba sa Cebu City Police Office ang katawhan nga likayan ang mga bisyo sama sugal aron dili madaot ang kinabuhi.  (BANAT NEWS)