Siyam ka durugista sa Carcar ug Mandaue sikop

CEBU, Philippines — Nasikop atol sa buy-bust operation sa kapolisan sa Carcar City Police Station sa Cebu Police Provincial Office (CPPO) ang usa ka suspetsadong high value individual ingon man ang kauban niini nga gikatahong street level individual diha sa Sitio Kalindoy, Barangay Liburon, Dakbayan sa Carcar niadtong Martes sa gabii, Mayo 27, 2025.

Ang mga suspetsado mao sila si Ronald Cuizon Yares, 42-anyos, minyo ug si Vince Kylle Espinosa, 26, ang duha pulos residente sa maong lugar.

Nasakmit sa kapolisan gikan sa mga suspetsado ang 136 gramo nga shabu nga mokabat ngadto sa P1 milyon ang kantidad.

Ang kapolisan nakadawat og taho kabahin sa sa ilegal nga kalihokan sa mga suspetsado.

Nagtingkagol karon sa detention cell sa Carcar City Police Station ang mga suspetsado ug gikatakdang pasakaan og tukmang kaso nahimo nilang kalapasan.

Sa laing bahin, gitanggong usab sa detention cell sa Presinto 1 sa Mandaue City Police Office (MCPO) ang pito ka tawo kinsa nadakpan atol sa managkalahing anti-drug operations sa kapolisan.                                                                                                                                     

Si Police Lieutenant Glenn Mark Cacoking, Officer-in-charge sa Presinton 1 sa MCPO maoy nangulo sa drug operations lakip sa check point diha sa North Reclamation Area.                                                                                                                                          

Unang nadakpan ang  lima ka tawo nga nagsakay og motorsiklo gikan sa Siyudad sa Sugbo kinsa mopaingon na untang mamauli sa mga lungsod sa Consolacion ug Cordova ug mga siyudad sa Lapu-Lapu ug Mandaue.                                                                                                                                     

Ang lima nga giila nga sila si “Atong”, 33, “Lino”, 43, “Petrol”, 23, “Jayson”, 37 ug “Lito”, 35.                                                                                                                                            

Gipahunong sila sa mga polis sa ilang paghidangat sa checkpoint nga gipahimutang diha sa Reclamation Area sa Barangay Centro.                                                                                                                          

Atol sa pagrekisa sa mga polis ngadto sa mga suspetsado nadiskubrehan ang gidala nilang mga pakete sa shabu hinungdan nga gipangdakop kini.                                                                                                                      

Samtang laing duha usab ang nadakpan sa Police Station 1 sa MCPO sa follow up operation sa kapolisan sa nagkalainlaing lugar ug nakuhaan usab shabu ang mga suspetsado. (BANAT NEWS)