Pets sa Cebu City pabutangan na og microchips

CEBU, Philippines — Mandatory na ang pagbutang og microchips sa tanang mga binuhing iro ug iring sa Dakbayan sa Sugbo isip pagpalig-on sa Responsible Pet Ownership tungod sa kadaghan sa mga libud-suroy nga mga iro ug iring diha sa kadalanan.

Si Cebu City Veterinarian nga si Dr. Alice Utlang miingon nga sugod buwan sa Hulyo kini sugdan pagbutang.

Apan kinahanglan nga iparehistro una ang mga binuhi diha sa ilang buhatan aron mabutangan og  microchip. Mipasidaan si Utlang nga mapahamtangan og silot kadtong mga dili motuman.

Dugang pa ni Utlang, sa pagkakaron boluntaryo pa ang pagbutang og microchip aron makatuman ang tanan. Ang matag microchip nagkantidad og P600 nga bayran sa pet owners ug lifetime na kini.

Tumong niini aron matumbok gayud kung si kinsa ang mga nanag-iya sa mga kahayupan ilabi na kun kini makapaak.

Sumala pa ni Utlang, ibutang ang microchip sa panit sa iro diin nakabutang ang data sa mga tag-iya apil na ang phone number aron dali matawagan ug dili gayud makalimod ang tag-iya sa ilang mga tulobagon.

Usa sa mga gilantaw nga hinungdan nga taas ang paak sa iro tungod kay adunay mga naglatagaw nga napasagdan sa mga tag-iya.

Gipahibalo ni Utlang, labi na ngadto sa mga nagbuhi og mga iring ug iro nga lapas sa napulo ka buok kinahanglan mokuha na sila og permit.

Giawhag ni Utlang kadtong mga tawo nga migamit og mga pets isip ilang adbokasiya nga walay permit nga mosunod kini sila unsay anaa sa balaod. (BANAT NEWS)