Huna FC nangu sa mga mananaog sa Fiesta Copa labing unang Bogo City Football Festival nagmabulokon

CEBU, Philippines — Ang pambato sa Huna FC maoy nangu sa listahan sa mga mananaog sa malampuson nga 1st Fiesta Copa Football Festival nga gipahigayon didto sa dakbayan sa Bogo niadtong  weekend.

Ang Huna FC, usa ka football club nga nagbase sa siyudad sa Sugbo ug naporma lamang niadtong miaging tuig, mipukan sa San Roque FC sa kulbahinam nilang sangka sa final aron birahon ang korona sa men's open division sa duha ka adlaw nga torneyo nga gipasiugdahan sa Bogo City FC inabagan sa Cebu Regional Football Association (CRFA).

Wala sab magpabitin ang Rongcales Futbolitos nga mipakyaw sa nag-unang duha ka puwesto sa 38-above category samtang ang LaHorse FC miwani sa Bogo City FC aron paglugwa nga kampiyon sa makalingaw nga sangka sa mga Soccer Moms.

Sa laing bahin, ang Don Bosco FC mipayaka sa San Roque FC aron sakmiton ang titulo sa 18 Under category, ang Giuseppe FC mitumba sa Azkals Developmental Academy (ADA)-Cebu aron dominahon sa boys 16 Under, samtang ang Center of Development (COD)-Cebu City Team, nga kumbinasyon sa mga batan-on ug masaarong magduduwa gikan sa Giuseppe, Sugbo Calidad ug Cebu United, maoy naghari sa boys 14 Under human gipakaging nila ang Near North.

Mihimo sab og kasikas ang Barili FC nga giyabaw nga rayna sa girls 15 Under human gipaluhod nila ang Don Bosco-Liloan.

Sa ubang mga resulta, ang Lapu-Lapu Heroes mipilde sa Guiseppe FC aron angkonon ang unang puwesto sa mixed 8 Under, ang University of San Carlos (USC) mipatigbabaw sa Sugbo Calidad FC aron pagtapos sa unang dapit sa mixed 10 Under, samtang ang Cebu Football Club Academy-Elite mibuntog sa Sugbo Calidad aron sila mamahimong kampiyon sa mixed Under 12.

“To all our participating teams, daghang salamat sa inyong kadasig, sportsmanship, and passion for the game! You made this festival a celebration to remember," matud pa sa mga nag-organisa sa makasaysayanong football event sa amihanang bahin sa Sugbo.