SHAABAA season 28 kasado na
CEBU, Philippines — Ang ika-28 nga season sa Sacred Heart Ateneo Alumni Basketball Athletic Association (SHAABAA) gikatakda nga mosikad karong Domingo, Mayo 25, didto sa Magis Eagles Arena sa Sacred Heart Scool-Ateneo de Cebu sa Barangay Canduman, dakayan sa Mandaue.
Ubos sa bag-ong liderato ni SHAABAA President Dr. Chammy Lastimosa Dalawampu, ang liga mipatuman og pipila ka mahinungdanong mga kausaban.
Una sa tanan mao ang pagpahigayon og drafting alang sa Division B.
"This allows players from batches in Division B who can't form a team to play while giving existing teams a chance to upgrade their roster through the draft. This increases the level of competitiveness, making each game in Division B a must-see," matud pa ni Dalawampu.
Dugang niini, ang SHAABAA mikuha sa serbisyo sa Metro Cebu Basketball Referee Association (MCBRA) aron mo-officiate sa ilang mga duwa. Ang MCBRA mao sab ang mga reperi sa Cebu Schools Athletic Foundation, Inc. (CESAFI).
Ang liga duna na lay duha ka dibisyon hinoon ning higayona.
11 ka teams ang magbugno sa Division B amtang walo ka koponan ang magkumbati sa Division C.
Ang Core Pacific ug 2kcares.org sa Batch 2000 uban ang guest team Magis Medical Fund nga gilangkoban og mga magduduwa gikan sa Ateneo de Cebu faculty ug staff mopakita'g aksiyon sa Division B.
Ang Top 6 matag dibisyon magtinagakay sa playoffs.
Kay naplastada na ang tanan, si Dalawampu naglantaw sa pagsugod sa ilang torneyo uban ang tumang kahinam.
- Latest
