Pacers buhi pa mipuwersa og Game 7 sa NBA Finals

CEBU, Philippines — Luyo sa balanse nilang opensiba, ang Indiana Pacers milampornas sa Oklahoma City Thunder, 108-91, aron pagpuwersa og Game 7 sa NBA Finals kagahapong adlawa didto sa Gainbridge Fieldhouse sa Indianapolis, Indiana.

Si Obi Toppin mikadlit og 20 puntos samtang si Andrew Nembhard midugang og 17 puntos aron tabangan ang Pacers pagtabla sa kulbahinam nga serye sa baraga nga 3-3.

Ang Pacers ug ang Thunder magtiwas sa katapusang higayon karong Lunes, Hunyo 23, didto sa Paycom Center sa OKC.

Si Pascal Siakam mipupo og 16 puntos ug 13 ka rebounds samtang si Tyrese Haliburton, nga miduwa bisan og dunay gipamati sa iyang bagtak, nakamaneho og 14 puntos.

Dako sab og naambag si TJ McConnell nga mihipos og 12 puntos, siyam ka rebounds ug unom ka assists alang sa Pacers.

Abante lamang og tres puntos, 28-25, human sa nag-unang 12 minutos, ang Pacers milusad og eksplosibong 36-17 rally sa ikaduhang kuwarter aron pagposte og 22 puntos nga bentaha, 64-42, sa halftime.

Padayong nanginit ang Pacers aron paburoton ang ilang labaw ngadto sa 90-60 human sa tulo ka kuwarter.  Ning puntoha, misurender na ang Thunder pinaagi sa pagpalingkod sa ilang mga starters.

Si Shai Gilgeous-Alexander mitali og 21 puntos samtang si Jalen Williams mitimbre og 16 puntos sa pilderong Thunder.