Pacers lumapit sa East finals

INDIANAPOLIS — Kumamada si Pascal Siakam ng 21 points at may tig-20 markers sina Myles Turner at Obi Toppin sa pagtabla ng In­dia­na Pacers sa isang NBA playoff record na 41-point halftime lead patungo sa 129-109 pagdaig sa Cleveland Cavaliers sa Game 4 at kunin ang 3-1 series lead sa kanilang Eastern Conference semifinals showdown.

Itinayo ng Pacers ang isang 44-point lead bago isara ang halftime bitbit ang 80-39 abante sa Cavaliers.

Maaari nang tapusin ng Indiana ang kanilang duwelo sa Game 5 bukas sa Cleveland.

“We’re going to keep approaching this like we have everything to prove. We know people don’t believe in us, so we’re just going to stay in the fight and keep fighting,” ani Pacers coach Rick Carlisle.

Pinamunuan ni Darius Garland ang Cavaliers sa kanyang 21 points habang nalimitahan si Donovan Mitchell sa 12 markers.

Hindi na nakalaro si Mitchell sa second half dahil sa injured left ankle.

Sa Denver, bumira si Shai Gilgeous-Alexander ng 25 points para pamunuan ang Oklahoma City Thunder sa 92-87 pagganti sa Nuggets sa Game 4 at itabla sa 2-2 ang kanilang Western Conference semifinals series.

Naharap sa isang eight-point sa kaagahan ng fourth quarter, isang 11-0 bomba ang inihulog ng Oklahoma City sa likod nina reserves Cason Wallace, nagsalpak ng dalawang three-pointers, at Aaron Wiggins, kumonekta ng isang triple, para agawin sa Denver ang bentahe.

Ang ikalawang tres ni Wallace ang nagbigay sa Thunder ng 75-73 abante matapos kunin ng Nuggets ang 73-66 kalamangan.