P800 milyong ‘bato’ nakumpiska ng PDEA
MANILA, Philippines — Tinatayang aabot sa mahigit P800 milyong halaga ng ‘bato’ na nakalagay sa mga kahon ng snacks na galing California, USA ang nasabat ng mga tauhan ng Philippine Drug Enforcement Agency (PDEA) sa isinagawang operasyon sa Pasig City kamakalawa.
Batay sa report ng PDEA, malaking drug smuggling ang pagkakasabat ng 120 kilos ng illegal drugs bandang alas-2 ng hapon nitong Linggo sa isang cargo warehouse sa Pasig at umaabot sa P816,000,000.00.
Ang interdiction ay pinangunahan ng PDEA Regional Office–NCR Eastern District Office, Southern District Office, PDEA AIU K-9 Unit, Eastern Police District, District Drug Enforcement Unit (DDEU) at Pasig City Police Station.
Ang bawat pakete ay nakalagay sa vacuum sealed at mula sa California, USA. Bineberipika na ng PDEA ang mga consignees mula Taguig, Pasig, at Makati City.
Nakumpirma rin ng PDEA sa pamamagitan ng Raman Spectroscopy, na matataas na uri ng Methamphetamine Hydrochloride o shabu ang kanilang nasabat. Wala namang suspek ang nadakip.
“This interdiction success is a product of strong collaboration between PDEA and our law enforcement partners. Our presence in major airports, seaports, and cargo facilities is not just necessary—it is imperative,” ani PDEA Director General, Undersecretary Atty. Isagani R. Nerez.
- Latest
