Mga nikandidato sa eleksiyon pasumitihon na sa SOCE
CEBU, Philippines — Giawhag karon sa buhatan Commission on Elections (Comelec) sa Siyudad sa Lapu-Lapu ang tanang nikandidato sa lokal sa niaging May 12, 2025 midterm elections nga mosumiter sa ilang Statement of Contributions and Expenditures (SOCE) sa dili pa ang adlaw sa deadline sa Hunyo 11, 2025.
Si Atty. Ann Janette Lamban, Lapu-Lapu City election officer nagkanayon nga ang local candidates gikinahanglan nga motuman sa lagda nga gipatuman.
Matud ni Lamban nga ang kandidato nga mapakyas sa pagsumiter sa ilang SOCE nidaog man o napildi sa niaging piniliay ang mapahamtangan og silot. Gikataho nga makita diha sa SOCE nga isumiter sa nikandidato ang nagasto niini sa piniliay gikan sa kaugalingong pundo o donasyon.
Si Lamban niawhag sa tanang nikandidato sa Siyudad sa Lapu-Lapu sa pagtuman sa lagda ug dili molapas sa Hunyo 11, 2025 pagsumiter sa ilang SOCE.
Gihangayo ni Lamban ang mga nikandidato sa pag-itemized sa kwentada sa ilang mga nagasto sa ilang pagpangampaniya sa nilabay’ng eleksiyon gikan sa kaugalingong panudlanan ug donasyon, gikan sa mga higala sulod sa 30 ka adlaw human ang piniliay.
Ubos sa Omnibus Election Code sa nasud gihigpitan ang tanang kandidato nga maghinobra ang magasto sa panahon sa eleksiyon sa ilang pangampaniya. BDB BANAT NEWS
- Latest
