Poll watchers, magtutudlo makadawat og dugang P1,000 nga honorarium

CEBU, Philippines — Gawas sa P2,000 nga usbaw sa across-the-board election allowance, ang mga poll watchers ug mga magtutudlo makadawat og dugang nga P1,000 nga honorarium isip bayad sa ilang serbisyo niadtong Mayo 12, 2025 midterm elections. Matud ni Department of Budget and Management (DBM) Secretary Amenah "Mina" Pangandaman nga ang maong honoraria dugang sa usbaw sa allowance nga una na nila nga giaprobahan nga gipundohan ubos sa FY 2025 General Appropriations Act.

Nikabat ngadto sa P758.459 milyones ang gipagawas nga budget sa DBM alang sa dugang tag P1,000 nga election honorarium.

Si Pangandaman nagkanayon nga ang maong lakang subay sa mando ni Presidente Ferdinand “Bongbong” Marcos, Jr. nga ilhon ang importanteng papel nga gihuptan sa mga poll workers ug mga magtutudlo isip frontliners sa pagpanalipod sa katungod sa mga Filipino sa pagbotar.

Gihatagan usab niya og gibug-aton nga ang ilang ahensiya padayong naminaw sa mga problema sa mga magtutudlo nga niserbisyo.

Nunot niini, gibana-bana sa Commission on Elections nga moabot sa 758,549 ang kinatibuk-ang ihap sa poll worker sa 2025 national ug local elections.

Matud sa Comelec nga ang mga poll worker makadawat sa ilang election allowance apil na ang gipahibalo nga umento sulod sa 10 ka adlaw pagkahuman sa NLE. BDB BANAT NEWS