Transition team ni Baricuatro pormal nga nipaila sa DILG
CEBU, Philippines — Pormal nga gipaila sa transition team ni Cebu Governor-elect Pamela Baricuatro ang ilang kaugalingon ngadto sa Department of the Interior and Local Government (DILG) Provincial Office kagahapon.
Sa iyang suwat, si Baricuatro nangayo og tabang gikan sa DILG Provincial Office nga gipangulohan ni Provincial Director Dr. Jesus Robel Sastrillo, Jr. aron matabangan ang hapsay nga transition sa Kapitolyon karong Hunyo 30, 2025.
Gihangyo usab ni Baricuatro si Sastrillo nga makigkoordinar sa iyang transition team subay sa Memorandum Circular 2025-016 nga nagtugot sa papel sa DILG aron masiguro ang hapsay nga turnover sa mga responsibilidad.
Nakadawat og kopya ang The Freeman (igsuong publication sa Banat News) sa DILG Memorandum Circular 2025-016 pinaagi sa Provincial Office diin matud ni Sastrillo nga ang maong memorandum nagtudlo og sestema ug proseso alang sa mga local government units (LGUs) aron masiguro ang limpiyo ug organisado ang pagbalhin sa katungdanan ug padayon nga serbisyo human sa eleksiyon.
Gipirmahan kini ni Secretary Juanito Victor Remulla ug nagkanayon nga ang pagtukod ug operasyon sa Local Governance Transition Teams makatabang sa pagmenos sa kalibog ug kalangay ug maghatag og kalinaw sa huna-huna alang sa mga outgoing ug incoming nga opisyales.
Human sa ilang pagpaila sa DILG-Cebu Province, nagpaila usab sa publiko pinaagi sa media ang transition team ni Baricuatro.
Ang team naglangkub nila ni Atty. Edmund Lao, isip head; Vice head Paulo Uy – IT and Digital; Spokesperson Ruben Licera – Media, Info, and Tourism kinsa ang mga iyembro gilangkuban nila ni Aldwin Empaces – Administration; Atty. Rubie Virtucio – Legal and Legislation; Mayor Titing Esgana – Budget and Audit; Ferliza Contratista – HR and Communications.
Gikataho nga si Baricuatro personal niining gipili ang mga sakop sa iyang transition team base sa ilang expertise ug kasinatian dili tungod sa politika apan tungod sa ilang kapasidad sa pagtabang sa pagtukod og “Bag-ong Sugbo”. (BANAT NEWS)
- Latest
