Mga lago nga drayber gibadlong sa RHPU-7

CEBU, Philippines — Nakadawat og mga reklamo ang Regional Highway Patrol Unit(RHPU)-7 labot niining mga drayber sa mga pasaheroan, tradisyonal ug kanang modern PUJs  nga wala mosunod sa traffic signage, wala motuman sa proper dress code, overloading ug dunay uban nga manigarilyo samtang nagmaneho. Ang pangulo sa RHPU-7 Police Colonel Wilbert Parilla, nihimo og operasyon sa dalan Osmeña Boulevard aron pahinumduman ang mga PUV drivers sa mga lagda .

Sagad sa mga nakitang sayop sa mga drivers lago, wala mag-uniporme ug dili kompleto ang gidala nga mga papeles. Gipasidan-an sila bahin sa pag seatbelt, mag karsones, polo shirt ug dili manigarilyo.

Wala una manakop ang mga tinugyanan sa RHPU-7 ug pahinumdom lang una ang ilang gibuhat apan sa sunod maisyuhan na sila og TOP nga dunay dakong multa. 

 Matud pa ni PMajor Silvestre Cenia Jr., Chief Intel Special Operating Team HPG-7 usa kini sa pamaagi aron pagpitol sa mga badlongon nga driver.  Sa post sa Banat News bahin sa operasyon kagahapon, daghang mga netizens nga nidayeg ug nihatag sab og mga impormasyon kun asa nga rota maoy angay butangan og random inspections. Rowena D. Capistrano, IBM BANAT NEWS